АҘНА АҒАЙ БАЛАЛАРЫ 
Аҙна ағай балаларын 
Теҙеп ҡуйған бер сафҡа, 
Бойорған ул улдарына 
Тигеҙ сафтан сыҡмаҫҡа! 

Ә улдары тыңламаған, 
Шаярған, көлгән, ҡасҡан. 
Шәмбе, сафты башлайым тип, 
Иң алға барып баҫҡан. 

Йәкшәмбенең йәне көйгән: 
“Ниңә торам иң артта?” 
Икенсе булып баҫҡан ул, 
Йүгереп килеп сафҡа. 

Кесаҙна тора өсөнсө: 
“Ошо булыр урыным, 
Мин, дүртенсе булып йөрөп, 
Әллә ҡасан арыным!” 

Шаршамбы бирмәй урынын: 
“Кесаҙна, тәртип боҙма, 
Ҡысҡырма, алда булам, тип, 
Туғандарыңдан уҙма!” 

Ә Йома үҙ урынында, 
Китмәй ситкә бер аҙым: 
“Мин - бишенсе! 
Һис бер ваҡыт 
Юҡ, - ти, - тәртип боҙғаным”. 

Дүшәмбе илап ебәргән: 
“Мин бит беренсе инем, 
Баҫайым үҙ урыныма, 
Зинһар, туғандар, тимен!” 

Матур итеп тамамлайыҡ 
Был шиғырҙың аҙағын. 
Дөрөҫ сафҡа баҫтырығыҙ 
Балаларын Аҙнаның! 
(Факиһа Туғыҙбаева)